Arts window on the world

#1Vilombeja i halafiañey, le zao ty sehanga’
Ty fanalolahy raike ro manongaleke ami’ty ongo’e havana
Onjoñe’e ka i tomi’e havanay kanao fery.
Lià’i fandia’e haviay ka t’i Drako: merem-bey,

Fa hamango an-doda ty fita’e ankavana.
Vaho holi-diona vinono’e ro isadiaña’e,
I fita’e haviay mitam-bibi-bey am-bozo’eo,
Telo ty loha-mereñe misodàke amy tsempa-paoma ao,

Nafantoke hanao raha tsitantane folo roe amby t’i Herkiolize
Zay ty renen-tsara ty talilie’ o nte-Grikao fa mbe ho tonjohize
Hamonoa’e hey ty liona nte Nemeane ana i mereñe Tifonay;
Vaho hanjamana’e i Hidra, i mereñe zato lohay;

Mbore hitsepake i amboa-hako telo lohay ,
vaho hitsindroke i paoma i Hesperide rey;
mbe hitsavavake amy lalam-bein-tsikeokeokey.
F’ie ndra vinono’ t’i Gorgoñe an-tifatse i fanalolahiy.

Hambankambañe ami’ty viloñe toy i talily Grika zay.
F’ie i Jesosy ty nandrebake i lionay
Naho nifandrapake amy amboa hako telo loha rey.
Vaho niazon-kavilasy ie tinifare’ i mereñey.#2

Bao, i Raike ho Aviy ty tokave’ o nte-Egypta aze
Betaheza re mañonjon-doda hañofoke ty loha i mereñey.
4000 taoñe añe mbe nitalily o nte-Kaldeao
Al Giskale: I Fanalolahiy hoe o Araboo.

Mira amy pinatetse amy Boke Masiñe ao:
Ia ze o Mpanjaka ty engeñe zao?
I Andriatompo, betaheza maozatsey
I Andriatompo, lahitsiay ami’ty hotakotakey.#3

Roe ty añara i vasiañe mitsopelatse amy lahara’ey:
#4Rasal Gety re: Ty Añambone i Mpamonotrobokey
Ras-Al-Awa: Ty Añambone i Tamaeñey.
Aa le mbe ondaty raike re amy Orfiokose.
Raike avao ty Mpandrebake Tamaeñe zay
Vaho i Mpijebañe Mandrombakey.

#5Korneforose: ro vasiam-paharoe amy fitsopela’e,
Ty Tsempa’e Mitongaleke ro oniñe ankile’e havana.
#6Marsike: an-kiho’e havana: ty atao ty hoe Famonontrobohañe.
#7Ma’asime: Ty Fañefehean-Kakeo;
ro trea amy pinatetse amy Isaia eo:
“kanao anoe’E i ai’E ho fañefehan-kakeo,
le ho vazohoa’e o tabiri’Eo…”

#8Goiame: Fandilovañe hoe ty Hebreo i raike am-pita’E haviay
Kaiame: ka hoe ty Arabo: le Lialiaveñe.

Hoe t’i Aratosey amy ty añamy Herkiolize:
“Manahake lahilahy mitromake mbore mivarimbariñe eo.
Tsy hay volañeñe,nofi’ay ty atao’e.
Tokaveñe ty hoe: "I Lahilahy Mitongalekey":
Mañìñe hoe ondaty milempotse reke;
Mizinjiñe ambone ey ty fita’e roe hoe mitakatse;
le ty fandia’e havana mandia ty loha ty mereñe mivanditse.”

Ndra t’ie taolo bey o Grikao ty viloñe tiañe.
Le fa rendre’iereo t’ie saontsin’ Añarahae haehae’e añe
ze talily iareo iaby, fa hoe t’i Aristotle zay: “Tinovotovonañe iaby ty talili’ay,
F’ie mbe mihaja ty hilala o taoloo ho a o ana’aio.”
Hoe ka ty raike: “Romoromon-kahilalan’ Añahare O talili’aio
Ty vente’e ro niarofoana’ o taoloo.

Talily raike manao t’ie i Herakles nijo am-po fiam-bey ao
Telo andro re vaho navotso’e an tane ao:
Talily i Jona zay, fa toe t’i Jesosy ro nañandrazaña’e,
Vinotsotse an-kibory ao ka Reke amy faha-telo andro’E.

Eneñe ty vasiañe mitsopelatse ambone ahandrefa t’i Herkiolize.
Vaton-kotsoke ty añara’e. Mbe tahina i Jesosy ka le hoe ty nitseize’E:
“I vato nado o mpandrafitseoy,
ninjary ty vato mikalañ’ i hotsokey.”#9
Ty hoe hotsoke Amo Grikao mifototse ami’ty hoe lohaleke.
Fonitse ty talily i Alikarabo amy Norizañey:
Ie ty Raike miheo mb’eo, handialia’e ty loha i rafilahiy.

********(Mbe añe ty maro)********

#1 Hercules

#2 Songa sare i Rekoko iaby iereo

#3 Sabo 24.8

#4 Ras al Gethi: (Arabo) Ty Añambone i Mpamonotrobokey

#5 Kornephorus: Ty Tsempa’e Mitongaleke

#6 Marsic: (Hebreo): ami’ty kiho’e havana: Ty Famonontrobohañe.

#7 Ma’asym: (Hebreo), Ty Fañefehan-Kaeko

#8 Guiam (Hebreo), amy fita’e haviay: Fandilovañe ndra Caiam: (Arabo) Lialiaveñe

#9 1 Pet. 2.6,7