Arts window on the world

#1 #2Fejañe’ ty fanalolohy i fanañe jabajabay:
Vontitirem-pita i lahitsiaiy i mereñey
Soa te tsy hihaofe’ ty loha’ i bibiy i sabakay
I nañeva i Jesosy amy fisoroñam-bata’Ey.

Toe hinao’ i mereñey amy Damy i sabakay fatrela’e,
Toe ni-tsietonimonek’ añe amy famañahia’ey.
Nitavana’ i Jesosy indraike i engeñey
Amy fiantofa’E an-dRaey.nahaeneke.

Itoy ‘ni-lahitsiay nañitsake ty fo i halafiañey,
Raike i rafilahiy ndre te roe ro mifangatotse ama’ey
Tsy vente’e ty fimanea’ i bibiy i sabakan-engeñey,
I fiafara’ey ‘nio ro havalaenkañañe.

#3Serpentariosy: Mpandrambe Mereñe ty añara raike,
#4Orfiokose: I Mereñe Voafejañey—malange te miraike,
Aa kanao tinambozo ty fita’ i maozatsey
Le aia ty ihembañan-tika i fanañe mpamitakey?

#5Onoke: ro vasiañe mitsopelatse am-peo’ i mereñey
Katao i fanalohahy to ivandibandire’e;
#6Aliaha: kanao voafatse i miolakolakey,
Toe pinatetse t’ie finan’Añahare i mereñey.

#7Trelebe: ty fihaminañe amy valañora’ey,
Mañambara t’ie Mereñe Mitsikarikary re,
Satan-dRekoko t’ie tsy eo ty mahity ama’e,
Mengoke naho miheloke iaby ze fombà’e.

#8Rasalehagose: ty añambone i Mitañey,
Ami’ty añambone i fanalolahiy vata’e i vasiañey.
#9Rasalàoa: Ty Añambone i Itamaeñey,
Katao ie ro toe fitama ze fonga olon-tane
Mbe ho zoen-tika indraike ty añarañe toy
Amy ty añambone i Herkiolize aroy.

#10Saìfa: fa vinonotrobo’ i halafiañey,
vaho mionjoñe i fandia’e tsinifokey,
tsy zay hao i tsinaran’Añahare haehae’ey:
t’ie ho demoke ty loha’ i mereñey
Vaho ho tsipoke ty tomi’i tamingay.

#11Triofàse: Fa linialia fandia i halafiañey,
#12Karnebose: aze ka i famonotrobohañey
#13Megrose: amy t’ie mifañatreatre iereo,
Tsy hay te aia, f’ie mbe hañazava o vasiañeo.

Askelapiose ty fitokavañe aze raike,
Fa fikanjia o nte Grikao ty zañahare’e raike.
I Anadahy i Andròy nanan’anake fito hambañ’ ama’e.
Ty hoe ty añara iareo ze mibeja ty añama’e:

I Mpampijangañe, i Mpañafake, i Tamaeñe,
I Mpampanitsiñe, i Mahatea vinta ami’ty Tañanoro’e,
i Mpañafake amy ze fonga aretene,
i Aoly mahajangañe ze kila hasilofañe.

Mbore nahafitambelo ondaty re ami’ty lion-jañahare- to
Naho ami’ty lion-drimo#14 fa ty fiaiñe ro ami’ty lio.
Ty vilo’e: mereñe roe mifameleke aman-kobay,
Mbe anoe o dokoterao henaneke zao i ravoravo zay.

Toe talilin-drazane i Tabiry i somondraraiy:
I Tamaen-ty kila ondatiy, ze nahagio i mereñey,
I mañome haveloñe, mbore mahajangañe,
I Mpañafake ra’elahiy, vaho talangom-Pamelañe.
"Le ho ama’areo mañeveñe ty añarako:
Le hijirike i andron-kamarentaney
Vaho fahajangañañe ro ho amy ela’E rey."#15

Hoe ty talily ze o beko raike tsietoetane zao
Amy fisamaha’ i Askelapiose, le hoe ty natao:
O ry Mpañafake ra’elahin-ty voatse toy!
Azo iaby ty renge! O ajajamena lahitsiay,
Amo taoñe ho avio rehe, ro hampijangañe o kilakila ondatio,
Mbore ho fitahe’o o kiborio! Halìsa ka ty hitomboa’O!
Tsy ho tampetse abey o fandrebaha’O!
Ampielaro o fehe’o vaho ampitombo o ondatio:
Hahavany hampisotrake ze vilasy abey ty fahihira’O,
Hañiririñe o helatseo ty añambone’O amy ze voafatse;
Ho vilasy Rehe, f’ie hitambeloñe fa ho rebahe’o o faieñeo,
Vaho ho indroe Andrianañahare ‘n-Iheo.

Mone toe talily mitalake i ajaja te Betlehema zay,
I nampiareña’i Fañahiy vaho natao ty hoe Jesosy Kristy.

#1 serpens: mereñe

#2 Orphiuchus: Mpandrambe Mereñe

#3 Serpentarius: (Latina) Mpandrambe Mereñe

#4 Orphiuchus: (Grika), Hebreo Afeichus ndra Aesculapius: ze midika: I Mereñe Voafejañey.

#5 Unuk: mivadibanditse, mitsikarikary

#6 Alyah: (Hebreo) : ty Voafatse

#7 Cheleb ndra Chelbalrai: (Arabo) I Mereñe Mitsikarikariy

#8 Ras-Al-Hagus: (Arabo): Ty Añambone i Mitañey

#9 Ras-Al-Awa: (Arabo): Ty Añambone i Tamaeñey

#10 Saiph: (Hebreo): Vinonotroboke

#11 Triophas: (Hebreo): Linialia fandia.

#12 Carnebus: (Hebreo): ty famonotrobohañe.

#13 Megros: (hebreo): mañatreatre

#14 drimo: gorgona

#15 Mal 4.2