Alikarabo
#1Ty vitra’e faha-telo toy misare halafiañe,
Tsy filongoa ty aze fa ndra rafilahiañe.
Gore’ ty fandiam-Panalolahy raike re
F’ie mañohatse ty tomi’e i finipo’ey.
Al-Akrabo ty añara’e, le hotake ty foto’e,
Fa hoe t’i Davida ami’ty firebeha’e:
"Andriañañe t’i Andriatompo, Lamilamikoo,
Fa niohe’e hañotake o tañakoo
Mbore handrapake o rambotañakoo"#2
#3Isdise: ka ty fitokave’ o nte Egyptao aze
Le hoe ka t’i Davida amy fibekoa’e aze:
“…aetaho raho… am’ ondaty raty mañotrok’ ahikoo,
le o rafelahy miarikoboñe ahy hañe-doza amakoo.#4
I Rekoko ty isarea’ i halafiañey,
Ie ‘nio ro rafilahy ondaty fa haehae’e zay,
Mpañangatse re naho toe raim-bande,
Mbore kalitake sikal’ amy fifotora’e añey.
Akore ka o vasia’eo, le i miloeloe añivo’ey
Antares i mena mañambasa amy foe’ey.
Famonotrobohañe ro koihe’ i raikey
Vaho #5Kore Skorpiy ka ty fo i halafiañey.
#6Ty vasiañe amy fifehera’ey le ty hoe: Lesa
Fa ndra te hitsipoke re mbe halesa.
Aa mbe ho onintika i Mpitam-paliy
Ie tinandrifi’e ana-paly ty fo i tsivokatsey.
#1 Alikarabo: “Efitane” ami’ty Gasy ila’e
#2 Al Akrab: (Arabo): halafia; (Hebreo): aly, ndra hotakotake
#3 Sal 144.1
#4 Isdis: (Koptika (nte-Egypta taolo)): Fañolora’i Rafilahiy:
#5 Sal 17.9
#6 Cor Scorpii : (Latina) : Fo ty Halafia