Ankazomena Fo
#1Heheke ty vilombeja mitoronjo eroy
Amy Alimizañey ty irampea’ ty raike toy,
Firiritam-basiañe isare’e hatae roe
Mitivalañe iereo le mifanikitse indroy.
Crukse hoe ty Grika, le raha fampisoaña’e;
Fandia’e pineke, naàmpatse iaby ty fita’e
I hataey natroatse, i voiñey naradorado eo,
Sevotse tsy mahakofòke ze ampijaleañe ama’eo—
Naho tsy azinjin-tombo’e tsinindrom-biio
Vaho azitse indraike o taña’e mangirifirio,
Le ndra mate ty hadageañe i amy hatae ajaley.
Nitrao-drehake iaby o taoloo fa hatae ajaley i sare’ey.
Ndra t’ie eo ty kiefakiefatse mahafonitse i sare zay
Raike avao ty najebañe añivo i Beze Màvoy ey
Fa tsy mahay tsy i hatae fampisoañañey
Ty ho tendreha’ i nimavoa’ ondatio zay.
Taolo bey ty nanampeza’ i norizañey
Le nioni’o tane avaratseo añe i viloñey;
F’ie tafara ty fipehañ’i Jesosy amy hatae ajaley
Le nisitsitse atimo atoy i vilombejañey.
Hoe ty ‘ndaty#2 mahilala taolo raike zay,
“Naho ni-te Jerosalema raho amy andro nanampezañe
I Jesosy Amy hatae ajaleiy le fa nitreako
O vasiañe efatse mbe tsy nioni’ ondatio.”
O mpiandriake tavaratse añeo ro nahavany valoha’ey
Naho nifokofoko homb’atimo mb’eo añe:
Le hoe ty fisenge’e: “Izaho ro nahatrea valoha’eo
O vasiañ’ efatse tsy nioni’ ondaty sikala ami’ty haehae añeo.”
Nandrazaña’ ty ‘ndaty#3 raike an-tsare i vilom-bejañey:
Tsi’inoñe fa i hatae nanampezañe i mereñe torisìkey
I nampandramban-tane i angorosy nane-dozay
Mira ami’ty pinatetse amy soratse masiñe zay:
“Nanao sare mereñe an-torisike i Mosesy mpitokiy,
Vaho nasampe an-katae; ho jilove ze tsinibo i mereñey,
Ie antea’e i meren-torisìkey le velon-dre.”#4
Mbe nabeja’ i Jaona mpiama i Jesosy ty hoe:
“Mira ami’ty nampionjoña’ i Mosesy
I mereñe am-patrambey añey,
Ty hañonjoñañe i Anakey.
Soa te tsy ho momoke ze miantoke Aze,
F’ie ndra hanañe haveloñe nainai’e.”#5
#1 Ankazomena Fo: ty vilombeja valoha’i Alimizañe: naho haleñe le oniñe soa ami’ty Hatsiha pak’ami’ty Saramantiñe; F’ie naho ami’ty efatse maraiñe (kekeo faharoe) le oniñe soa ami’ty Saramañitse pak’ami’ty Sakamasay.
#2 Dante (taoñe 1265-1321)
#3 Eben Ezra, (taoñe 1092-1167)
#4 Nom 21.9
#5 Jao 3.14-15