Alimizàñe
#1Sinare’ i Asombolay t’ie hisorom-bata’e i Ho Aviy
Hameloma’e o ‘ndati’eo: aia ka hahatafete’e zay?
Zay ‘nio ty talin-talily mitoiñe amy raikey.
Libra ty añara’e: Balantsy mihilañe i sare’ey
Oniñañe hey o vasia’eo soa te hahilala:
Mozanaime: Ty Finga Roe Milanja raha,
Al Zobenà: Ty Vili’e naho i Fibiroña’ey,
Zogose: ty joko mitarazo i finga’e roe rey.
Aa le taroñañe kiraikiraike o añaram-basiañeo
Fa i mitsopelapelatsey ro fivolañe minday fibejañañeo.
Ty ti-hoe ro amy finga tsy ampe lanja miradoradoy,
Zobène al Genòby#2: Tsy Nahatsàke i Vili’ey.
F’ie amy finga filanja mahaleoy, le ty hoe
Zobene al Semal#3: Nahaeneñe i Vili’ey,
Le Kafara#4: Efe-Tahiñe, naho Grafiase: Pinioke
I lanja i soroñey ro sombeañe amy henanekey.
Al Goby ka ty añara’e raike ie milogologo ty havesa’e
Akore nitsititiahan-dio tama’e, Ie trinofa’ i lefoñey
Mbore nidoandoañe ho an-tikañe hañalio o tahiñeo
Tsy kinapeke hoe soron-ose ty hakeo fa mone piniopio
O lion’ añondry tsy fotofotoo tsy nahaleo o hakeoo,
Fa hoe t’i Daniela amy Belsazara mpanjaka o nte Babiloniao:
"TEKEL: Fa linanja balantsin-dehe, le zoen-t’ie tsy mahatsàke".#5
Amy haleñey avao re nikorokomake, i tane’ey rotsake.
Hoe ty Sabo: "Ia ty mahavoavili’ aiñe an-dongo’e,
Ndra te banabaem-biroñe an’Andrianañahare ho aze—
Sarotse ‘nio ty vilin-ai ondaty, mba tsy hisaok’ añe re kitro katroke—
Soa t’ie ho veloñe nainai’e re, mbore tsy hikorokomake.#6
Ia ty ondaty, ndra t’ie andigiligi’ lohàñe
Hahaondroha’e ty vilin-ai’e, hañeva raha tamaeñe?
Toe vovoke o vohitseo, mbore vande ka o ana-donakeo:
Ie lanjaiñe iereo, le songa maivañe ta amo kofòkeo.#7
Eo ka ty Zobene al-Akraba: tandrife ty oro i Vinonoy :
Ty Viliñ-ay amo Alio: i dika o vasiañe mahabejañeoy.
Loho sarotse ty viliñ-aiñe katao pinatetse ty ti-hoe:
Vinono ami’ty fifotora ty voatse toy i anak-añondriy.#8
Mañeva handrambe i bokey, havitsoha’o i hili’ey,
Amy te Ihe vinono, le ty lio’O nahajebañe ondaty
Amy ze hene foko, naho fameleke, naho tarira, naho tane
ho an’Andrianañahare," zay ‘nio ty fisaboañ’ añe.
Hoe ty nabeja’ i bokey ami’ty viliñ’ay natolo i Ana’Ey
Ty lio i Jesosy Kristy ‘nio mañalio ze fonga tahiñe aman-tikañe.#9
Zay ‘n-o fañina vao! I lion’Añaharey ty nahajebañe ze kila ondaty—
Ze hene miantoke Aze mbore manao i sitrak’arofo’Ey.
#1 Alimizañe: ty Viloñe faharoe toy: naho haleñe oniñe soa ami’ty Volantatake pak’ami’ty Saramantiñe; F’ie naho ami’ty efatse maraiñe (kekeo faharoe) le oniñe soa ami’ty Valasira pak’ami’ty Volantatake
#2 Zuben al Genubi: ty vasiañe mazava ama’e
#3 Zuben al Shemali: vasiañe fahareo ami’ty fitsopela’e
#4 Kafar, naho Graffias naho Al Gubi mbe tovon-añara’i vasia Zuben al Shemali avao
#5 Dan. 5.27
#6 Beko 49:7-9
#7 Beko 62.9
#8 Apok 13.8
#9 1 Jao 1.7b