Botèse
#1ro tsitso’e amy vavea’i Asombola rey
Mihitrihitry mb’etoa re, « Ho avy » ro tahina’ey,
Am-pita’e havanay ty kibay fiandraza’e
Zonjoñem-pita havia’ey ty meso fanataha’e
Mifale i lañitsey, varanehake o faritaneo;
Mitreñe i riakey, naho ze himpoke ama’e ao,
Mirebeke ty hivoke, naho ze hene raha ao.
Le misabo iaby ze kila hatae añ-ala ao
Añatrefa i ANDRIATOMPO, i Ho Aviy,
Ho ave Reke hizaka ty voatse toy.
Ho zaka’E iaby iereo ami’ty hato’E,
Le ze kila ondaty ami’ty fahiti’E.#2
Ty tahina’e raike Arktofilàkse, mpitao o añondrio
Tsy ia fa i Jesosy ‘nio ro atalili’eo.
Ho Avy i Mpiarake Soay hoe o taoloo,
Hehe ka ty vasiañe hampalange ty añama’eo.
Arktorose#3: mbe i Ho Aviy i koi-dava’ey
Al Kaloropse#4: i lohan-kibay miporengotsey
Mañatò t’ie mpiarak’añondry vata’e i tompo’ey.
Mirac#5: mipitsike mb’etoan-koe ana-pàly.
Nekkar: Tinomboke! hoe ty vasian’ añ-ambone’eo
Vaho ho oni’ iereo soa Raho ie fa tinombo’iereo.#6
Merga: vinonotroboke ka i trinofakey#7
F’ie o fere’eo ro mahajangañ’ antikañe!#8
Morfride: Mpañambake ty ose amo añondrio.#9
Aa le Ie ty hizaka o kilakila’ndatio.#10
Amy ho avi’ey tsy haliño’e i fanataha’ey
Fa zay ty fanontoña’e amy andro tsitso’ey:
Niheo eo ty anjely raike añ-anjomban’Añaharey ao,
Le hoe ty pazapaza’e ambone i rahoñey ey:
‘Afirao amo mesa’oo; manataha fa tondroke i fanataha’oy;
Mirotrarotra ‘nio ty san-kabobohan-ty tane toy.#11
Fange raike zay amy pinatetse an-dañitsey
Ami’ty viloñe valoha’e nabejan’Añahare haehae’e.
Aniahiañe hey i talily fanjaka nionintikañey—
I ajaja niotroen-drene’e, i tiry nitamaeñey:
Nitombo reke: f’ie ndra nampiore i Andrianamboatsey
Mpiarak’aman-doda, miamben’amam-piletse.
Vinonotroboke le tinomboke, vilasy f’ie nivañombeloñe
Ho avy, ami’ty renge’e re, trèntrañe le am-pikokoañe
Hambaha’e amo tsereheñeo ondaty noro’eo
Tika miantoke Azeo mbore ze manao o sitrak’arofo’eo
I Poltserima: I ginokey ro vasian’tovo tsy liva’ey
Fa fanjaka am-bohitsey ty fandia i mitalily soay.#12
Tampetse o talily bore’ i Mpandrombak’ aiñeo
Toe mitrao-drehake iaby o vilo’eo naho o vasia’eo
Raike avao ty Tsaran’Añahare ke t’ie am-boke ao, ke t’ie ambone ey
Fa songa mandrengetse Aze iaby i sata fitaliliañe rey.
#1 Botese (Grika) hirik’ami’ty Hebreo: “Ho Avy”
#2 Bek. 96.11-13
#3 Arktorose: Vasiañe mitsopelatse soa ami’ty pokopoko’e ankavia
#4 Al Kaloropse: ami’ty loha-kibay
#5 Mizar, Mirac: Añaram-basia raike: ambane ty vania’e ami’ty ankavana’e
#6 Zak 12.10
#7 Merga (Heb): mpamonotroboke
#8 Isaiah 53.5b
#9 Morfride: Oniñe ami’ty taolamai’e ankavia: I Mpañambakey
#10 Mat. 25.32 mitohy
#11 Apok. 14.15
#12 Isaiah 52.7